Ka nyi se vande eren man se pase asorabo? Se vande eren akaa a nyiin.
- Se er msen er Aôndo A na se gratia sha u pasen asorabo ase dedoo yô.
- Se wa iko sha u umbur asorabo ase cica.
- Se zungwe sha asorabo ase a ishima i môm.
- Se taver ishima sha agee a Aôndo sha u vendan hanma kwaghbo, man u eren ieren i dedoo ken hemen kpaa.
MBAMSEN MBA WAN IYOL SHA U PASEN ASORABO
Se er msen er Aôndo A na se gratia sha u pasen asorabo ase dedoo yô.
Aôndo Ter, se mba ônouv Ou, kpa se undu ya Wou sha u eren akaabo. Kpa Un ngu Ter Wase gbem. Nahan gema se asema er se hide her a We, man se zua a mde u asorabo yo, gadia hanma shighen cii U zungwe mba geman asema mhôônom, Amen.
Yesu, yan U hemba ku man kwaghbo sha terenkon sha aci wase. De kera hungur se hegen ga, kpa sha atsan Ou kohol se man ôô akaabo ase kera sha awambe a Ou, a U hee sha terankon la. Nahan Wea a rumun yô de se sha hanma ibo yase cii, Amen.
Cighan Jijingi, wanger se asema, sha er se fa akaabo ase cii, man se zungwe sha mimi kpaa yô. Na se gratia kpaa u eren mpase u dedoo man taver se asema sha iwasen You er mayange se kera vihin Aôndo ishima ga yo, Amen.
Cighan Maria, Ngô u Yesu, ishima you i lu wang gbem. Nahan se mba zamber we, nenge sha a vese, ônouv Ou mba se lu zenden sha gbenda u daang la. Er msen sha aci wase, er, sha gratia u sakramentu ne, Aôndo Una wanger se asema, man se lumun imo Na yô. Amen.
SE WA IKO SHA U UMBUR ASORABO ASE CICA
Shighen u u pase kwaghbo hen Father yô, kaa a na wer “M er kwaghbo nahan kwa môm shin kwa nviin shin kwa pue”. Ôrun iyenge sha mimi. Man shi de kera kaan wer “M vihi tindi u Aôndo u sha utaan” tsee ga gadia alaghga u vihi ishima, alaghga u wua or’ kpaa alu wea or nahan yô, Father una fa ga.
M vihi tindi u Aôndo u hihi; sha u eren msen u pepe ga; sha u eren msen u tugh ga; sha u eren msen wam daang; sha u eren msen shighen u kwaghyan ga; sha u sôron akombo; sha u bunden Iyol i Yseu i yan sha shighen u Easter.
M vihi tindi u Aôndo u sha uhar; sha u bumun hange hange ga; sha u bumun sha ayie; sha u bumun gbilin.
M vihi tindi u Aôndo u sha utar; sha u eren tom sha iyange i laadi, shin iyange i tseghan (er yange i Kilemishi, Christmas, nahan); sha u bunden adua sha iyange i laadi shin iyange i tseghan.
M vihi tindi u Aôndo u sha unyiin; sha u tuhwan orvesen wam; sha u lahan mbamaren shin mbavesen av; sha u ungwan imo i mbamaren av ga; sha u vihin ishima i terem, shin ngôm, shin ovesen wam; sha u taver ityough; sha u wasen mba tesen kwagh u Aôndo ga; sha u wasen mbamaren av ken atsan a ve ga.
M vihi tindi u Aôndo u sha utaan; sha u wuan or; sha u gbidyen or; sha u nôngon num; sha u zôhon zwa; sha u hiin ayongo; sha u vihin yaav; sha u oon iyev; sha u tuhwan or; sha u vihin ishima; sha u kôron or genegh ihom; sha u nyioon ishima yum.
M vihi tindi u Aôndo u sha ateratar; man sha utaan kar unyiin; sha u nengen akaa a bo; sha u henen; sha u tômon akaa a daang; sha u lamen daang daang; sha u wan atsan a daang; sha u vinen amar a daang; sha u luun a ishenden iyolough i bo; sha u numben inyumbe i daang; sha u tindin a tindi; sha u eren idiar; sha u yaven a wankwase; sha u yaven a kwase u or.
M vihi tindi u Aôndo u sha utaan kar uhar; sha u iin, iyough-inyaregh-kwaghyan; (kaa Father aluer ka canor u ii nan kwagh, shin shagbaor); sha u wasen ormbaiiv; sha u yamen kwagh u mbaiiv; sha u tôon kwagh u a lu wam ga yô; sha u koson kwagh u a lu wam ga yô; sha u kimbin injô ga; sha u taver ishe ken kasua; sha u tsughun or; sha u ngohol injaar; sha u keren injaar; sha u nan injaar; sha u vihin akaa a orvesen wam; sha u vihin shighen u tôm; sha u ôron wasika u or genegh sha apera.
M vihi tindi u Aôndo u sha anieni; sha u eren ayie; sha u eren shiada u mimi ga; sha u vihin iti i organ; sha u vihin ityendezwa yam.
M vihi tindi u Aôndo u sha pue; sha u tômon akaa a organ; sha u eren iyuhe;
M ya inyam sha yange i mhii u Lent shin iyange i tom ataan u
dedoo. M ya kwaghyan yum sha iyange i hôron.
SE ZUNGWE SHA ASORABO ASE A ISHIMA I MÔM
Sha u zungwen sha akaabo yô, ka se taver ishima sha u vendan kwaghbo u ken hemen. Hen shien ne ka u se kundu ishima, se hen sha akaabo aa se er la cii shi se nôngo sha tahav asev cii u yangen kwaghbo la sha er se taver ke jijingi man se seer mtaver u jighjigh wase u nan hen Aôndo yô
HEGEN SE PASE ASORABO ASE HER FATHER
Mhii; Verem, Father, sha aci u m er kwaghbo, Kuma saati môm (laadi, uwer, inyom) man m lu a za ipasen ga ye. Ngu ka asorabo am je ne; m vihi tindi u Aôndo u sha (yila tindi shon, kua ishoribo man kwa u er ishoribo shon la)
Mkur; Akaabo agan man aa m fetyô u umbur aa heen hegen ga kpaa, mzamber Aôndo sha mde u aa, man hen awe Father u lu a tahav (agee aa) mbu nan mo mtsaha sha mde u aa.
SE VER ATO MAN SE UNGWA MTSAHA U FADA UNA NA SE LA.
Mpase bee, se yem hen iyou i Aôndo sha u eren mtsaha la, man mbamsen mbagenev kpaa.
MSEN KEN MASEJIME U MPASE
Tere, m wuese We kpishi. Mo, m lu wan Wou sha Baptisema wam. Kpa m due her a We sha u eren akaabo. Hegen yô U nam mgemishima man mde u asorabo sha er me hide a We yô. We U ngu Aôndo u mhôôn je. Nahan, taver mo ishima er mayange m kera undu U ga, kpa me tema ya Wou, er wan Wou u mimi man u eren We tom u dedoo yô, Amen.