Gbenda U Terankon

Orhemen: Ken iti i Ter, man Wan, man Cighan Jijingi,

Ior: Amen.

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

Se er nen msen

Aôndo Ter wase, Lu sha u ungwan ikyaan You man Wan Wou u môm rumun ku u sha Terankon sha ci u mwar u ior cii ye. Er se rumun a kwagh u kpilighiyol u terankon ne shin tar ne yô, ma se ngohol iyua i mwar sha Tartor kpaa. Se zamber ken iti ii Yesu Kristu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I HIIHII

I ÔR YESU IJIR I KUUGH

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH JÔN

Hii hen shie la je Pilatu gba keren ian i pasen un tuhwan, kpa mbajuda genger amok aa er. Aluer u pase or ne yô u ngu ikyar i Sisar ga. Hanmaor u nan veren iyol er na ngu tor yô, nan ngu hedan kwagh a Sisar. Pilatu ongo akaa ne yô, a due a Yesu ken won, tsô a kaa er. Nenge nen tor wen, kpa ve genger amo er. I yem a na kera i yem a na kera i za mande un sha terankon. Pilatu kaa a ver er. M mande tor wen sha terankon noo? Upristi mbatamen gema kaa er se mba a tor ga, saa di Sisar tsô. Tsô man a na ve un sha u i za mande u sha terankon yo. (Jôn 19:12-13a)

Akaaôron a Ter wase

Ka nahan m doo Ter ishima ye sha aci u M na uma wam sha u me ngohol kpaa ye. Ma or kpaa nan ngu ngohol un ga kpa ka mo iyol yam je m lu nan ye, M ngu a tahav mbu Me na un Mngu a tahav mbu Me shin M ngohol un kpaa. Tindi ne Me ngohol un hen Terem. (Jôn 10:13-18)

Se er nen msen

Tere, ka sha awambe a haan nya man wan wou Yesu Kristu ver se kwagh u kpiligh iyol u paseka ne ye gema se sé hingir mbatseghan sha erdoo wou la man kuran se hanma shie cii. Se zamber ken iti Yesu Kristu Tor wase Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA UHAR

YESU TÔÔ TERANKON

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH JÔN

Nahan ve kôr Yesu, ve yem a Na. man A tôô Terankon iyol Na, A due a za hen ijiir ii yilan er Igbyôndotyo la, man ken zwa u Hebreu yô er Golgota. (Jôn 19:17).

Akaaoron a Terwase

Aluer antior u a sar nan u van amo ityô yô nana nyima iyol i nan nana tôô terankon u nan nana dondo sha amo. Gadia hanmaor u i sar nan u yiman uma u nan yô, una a saa nan a saa kpa hanmo u uma u nan una saa nan sha ci u iti yam yô, nana zua a mi je. Gadia a lu er or nana zua a tar cii kpaa uma u nan una a gema a saa yô a doo nan sha nyi? Shi ka nyi kwagh man or nana na sha u paan uma unan sha mini? (Matyuu 16:24-26).

Se er nen msen

Aôndo u hembanagee man u tsôron, U tindi Wan Wou wer, a va hingir or man a ya ican a Terankon, i lu ikyav i tesen hen ior cii sha er ve a dondo yô. Se zua a ityesen i dedoo ken atsan a Na er u ne; Wase se va zua a kwar ken mnder Na shin ku kpaa. Se zamber ken iti ii Yesu Kristu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA UTAR

YESU GBA SHA TERANKON KWA U HIIHII

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man u yem tar ye.

KEN PROFETI AZAIA

Ter Aôndo bugh ato am, m hendan ga, m hide ijime kpaa ga. M gema ijime yam M na mbagyidyen, ahenge am kpaa M na mba gbelan ice; m yer ishigh yagh kera sha u cian kunya kua azer a haan ga, Kpa Ter Aôndo wasen Mo; nahan yô, kunya kôrom ga; ka nahan kpaa M ver ishigh er ka iwyen i gberusu nahan, shi m fe mer me va ahenge kpaa ga ye. (Azia 50:5-7).

Akaaôron a Ter wase

Mimi mimi je m kaan ne ne, aluer ishange wua ia gba hen inya man ia kpe ga yô, ia lu di her imôm tsô; kpa aluer ia kpe yô ia mar kpishi. Or u uma u nan a doo nan yô uma la una saa nan; or u nan ker uma u nan ihom shin tar ne yô, nana lu a mi zan zan uma u tsôron. Hegen ishima ngi tan Mo kwe; tsô shi Me kaa nena? Tere yima m due a mo hen shie ne kera, Kpa ka sha ci u kwagh ne je man m ve hen shie ne ye. Ter na iti You icivir. (Jôn 12:24-25, 27-28a).

Se er msen

Tere, ka sha u ungwan ikyaan you man Yesu Wan Wou A mough a tar u u gbe ne sha ye. Due a vese ken ishoibyo kera, man nyôr avese ken iember i been mayange ga la. Se zamber ken iti ii Yesu Kristu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA UNYIIN

YESU ZUA ISHIGH A NGÔ NA MARIA

Iorhemen: Se civir We, Kristu man se wuese We,

Ior: Sha ci u sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH LUKA

Simon ver ve doodoo shi akaa a Ngô Na Maria er: “Wan ne yô, i ver Un sha aci u mgbe man mmough u ior kpishi ken Israel. Man sha aci u ikyav i a nyiman i yô, We kpa sanker un a sôô u ken ishima, sha ci u mbamhen mba ken asema kpishi ve a due ken igbyar yo”. (Luka 2:34-35).

Akaaôron a Ter Wase

Mo yô M va sha u ve zua a uma, ve zua ami wuee je. Mo M ngu orkuranilev u dedoo, M fa mbi yav, mbi yav kpaa fam, Voogh er Ter A fem, Mo kpaa m fe Un nahan, man shi m na uma Wam sha ci u iyongo. (Jôn 10b; 14-15).

Se er nen msen

Tere, u tsegha iniuun kwase Maria wer, a lu Ngô u dedoo u Wan Wou, Nahan yô, U vande nan un ci ken myom u Kristu a ve a mi sha ku na la. Man u ver un a ishoibyo shio, hii shie u i jile un ken uya la je. Wase se kpaa sha mbamsen nav, er se lu waang sha ishigh You yô. Se zamber ken iti ii Yesu Kristu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA UTAAN

I KIGHIR SIMION U SIRENE TÔÔ TERANKON

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH MARKU

Yô organ due ken ikyôngo lu Karen, iti na er Simon u Sirene, Ter u Alekesandar man Rufu, ve kighir un er a tôô Terankon Na. (Marku 15:21).

Akaaôon a Ter wase

Orhenen hembe ortesen ga. Wanakiriki kpaa hembe ter na ga. Orhenen nana a hingir er ortesen u nan nahan yô, kuma. Man wanakiriki kpaa nan a hingir er ter u nan nahan yô, kuma. Aluer i yila orya er Belsebul yô, man hire mba ken ya naa? Man de cie nen mba ve woo iyol tseegh, kpa ve fetyô u wuan uma ga la ze. Guda cia nen Un u a fetyo u timin uma kua iyol cii ken gehena la. (Matyuu 10:24-25, 28).

Se er nen msen

Tere, sha awambe a haan a wan wou la, u pase ior cii u tuha man u war ve sha ku kpaa. Za hemen u eren tom u dooshima Wou la ken vese, sha er u eren iniongo i misiterium u myom wase ne, se nyôr sha ityendezwa Na i tsôron yô. Se zamber ken iti ii Yesu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA ATERATAR

VERONICA ESE YESU ISHIGH

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN PROFETI AZAIA

Ka an je nan ne kwagh u i pase se la jighjigh? Man i pase tahav mbu Ter hen nana? Gadia A vese sha ishigh nag her zamkon nahan; man er mishe u shin inya i ombor yô, lu a ma mkomashe shin icivir i se kenger un ga, lu a ma dooashe u un a sar se kpaa ga. i laha un, ior kpaa ta un kera, lu or u yan ican, hool un a angev kpaa, i laha un, man se kpaa se wa un iko ga (Azaia 53:1-3).

Akaaôron a Ter wase

Or u nan nenge a Mo yô, nan nenge a Un u A tindim la. Mo M va shin tar ne er iwyanger nahan sha u or u nan jighjigh nan de kera luun ken ime her ga yô. (Jôn 12:45-46)

Se er nen msen

Aôndo Ter wase, ma kwagh u myer môm ngu hen We ga, sha ci u hanma ishima yô ngi vyegher hen We; man hanma msoo kpaa U fa. Iv asema ase a iwyanger i Cighan Jijingi Wou, zenda aferakaa a henen a gba ica a vese er U doo se ishima dedoo, man se wuese We vough yô. Se zamber ken iti i Yesu Kristu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA UTAAN-KAR-UHAR

YESU GBA KWA U SHA UHAR

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN PROFETI AZAIA

Ka atsan ase je A tee sha iyol Na ye, izungwen yase kpaa A tôô; kpa se yô lu se er kwagh tser Un a tser je yô, man er Aôndo kpaa tsaha un, shi kighir Un a ican kpaa yô. Kpa i kuma Un sha ci u akaabo ase, i vihi Un iyol sha ci u aferakaa ase. Ka sha a Na mtsaha u van se a bem la a lu ye. Ka sha a vav a Na man i wanger se ye. Se cii se tsume er iyôngo nahan, hanma wase hulugh sha u zan sha gbenda u nan, kpa Ter gema na ibyo yase cii i shire sha a Na. (Azaia 53:4-6).

Akaaôron a Ter wase

Lu nen er ior mba veren ashe a ter ve zum u a mogh ken iniongo i kwasehe a lu hidden la, sha er shie u uma va mande uwegh sha hunda yô, ve a bugh un fese yô. A saan mbatyomov mba ter ve una va kohol ve kulan la iyol, ne kpaa kohol ne iyol nahan gadia ka hen shiegh u ne ver shima ga la je wan u or Un a va ye. (Luka 12:36-37a-40).

Se er nen msen

Aôndo u hembanagee, wase er se mba se taver ga, man mlu wase ne a ne se ameen hanma shie ne, se gohol iôôn i uma ken atsan man ku u Wan Wou Yesu yô. Se zamber ken iti ii Yesu Kristu Tor wase, Amen

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA ANIENI

YESU ZUA A ÔNKASEV MBA KEN JERUSALEM

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH LUKA

Ikpilaior Kpishi dondo Un, kua shi kasev mba ve lu vaan zungwen Un kpaa. Kpa Yesu gema ashe ken ve kaa er: “Ne ônkasev mba Jerusalem, de kera vaan nen sha ci wam ga, kpa vaa nen sha ci wen, ayol a en man sha ci u ônôv enev kpaa. Gadia nenge ayange nga van a ă kaa er: saan kasev mbakyômov iyol, man iyav mbu mbu lu a mar mayange ga, man atumba a i lu a ambe a mayange ga yô. Sha ayange la ve a gba kaan a iwyo er, kighir nen se; man agungu kpaa er; cir nen se; Gadia aluer ve a eren akaa a ngan sha kon u ndor yô, u ombor je yô a er a u nena?” (Luka 23:27-31).

Akaaron a Ter wase

I saan mba ve zungu la iyol, gadia a sur ve asema. i saan mba i eren ve ican sha ci u kwagh u perapera la iyol, gadia Tartor u sha ka u ve je. I saan ne iyol zum u ka a heen ne, a tôvon ne a ican man a teren ne sha hanma inja ifyer sha aie sha ci Wan yô, ember nen, i saan ne ken ishima tsuung; gadia injar yen vese sha.

Se er nen msen

Tere, wase se er se hingir er Wan Wou Yesu Kristu, U tar ne doo Un ishima man kpe sha u waren se la. Ngbegha se ken dooshima Na man hemen se sha ikyav Na i tesen la. Se zamber ken iti ii Yesu Kristu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA UTAAN-KAR-UNYIIN

YESU GBA KWA U SHA UTAR

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN PROFETI AZAIA

I tôô Un sha tindi man sha mkighir. Ka anti nan a ôr kwagh taveraa sha ityôkyaa na? een, i gber Un ken tar u mbaumav kera, lu sha ci u ibyo yase man ku wua Un ye. i na Un war a mbaerenakaabo man mbanyarev imiôngo, kpa a er ma kwagh u ifyer ga, icugh kpa lu un ken zwa ga. Nahan kpa lu ishima i Ter je u nan Un atsan. Aluer A gema iyol Na A na naagh a mi sha ci u isholbyo yô, Una nenge a tsombor na, Una tsa sha won man a er kwagh u Ter A ver ishima sha min la sha wegh nagh. (Azaia 53:8-10)

Akaaôoron a Ter wase

Va nen hen Mo ne mba i ver ne iyol cii, ikyav mbi yoho ne kpaa, Mo me na ne mmem. Tôô nen igbyur yam sha ayol a en,, va hen nen kwagh sha ikyev yam, gadia M ngu ishima leghlegh man M kehen ityogh kpaa ga, tsô ne zua a mmem ken asema a en, gadia igyur yam leghem man ikyav yav kpaa peese. (Marku 11:28-30)

Se er nen msen

Ter, atsan man ku u Yesu Wan Wou u mtswen ma ve er se ma se lu kwagh u doon We. Se tseegh yô, se fatyô u eren ma kwagh ga. kpa naagh ku dedoo ne, ma ku ve se a mhôônom Ou man dooshima Wou. Se zamber ken iti ii Yesu Kristu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA PUE

I ER YESU AKONDO NA KERA

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH JÔN

Tsô mbautyaav mba manden Yesu kera yô, ve kura akondo Na, ve ver atihi anyiin; riga Na u vesen la kpa ve ver her, riga la lu a ikôron ga, lu dyem cii tume shin inya. Tsô ve kaa ayol ave her er, Se ande nen un ga; kpa se er nen ishor sha min man se fa or u una lu u nan ye. sha er kwagh u icighanrwamabera lu kaa la a kure sha mi voogh yô, er; Ve kar akondo Am her ayol a ve, ve er ishor sha riga Wam. Akaa ne mbautyaav er a voogh.” (Jôn 19:23-24).

Akaaôon a Ter wase

M va sha u me haa usu sha tar; sarem tsung er ma i keer u kere ve yô. Batisema ngu u i lu u a erem keng yô. M ngu yan ican ken ishima zan zan a kar kuren. (Luka 12:49-50).

Se er nen msen

Ter, ka sha atsan a Yesu wan Wou U yem se sha ku u se zoo a mi hen orsholbyo Adam ye. sha tindi u gbaaôndo yô, se mba a ibyeen na er or nahan. We a rumun yô cighan utaha i grasia ne i wase se, er se cir ibyeen i Ter wase U sha Tartor la iyol yô. Se zamber ken iti ii Yesu Kristu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA PUE-KAR MÔM

I MANDE YESU SHA TERANKON

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH JÔN

Ve mande Un sha terankon her man mbagenev uhar a na imiôngo kpaa; u mom keen, u mom keen, Yesu lu hen atô, shi Pilatu nger kwaghyôôn var sha Terankon la, i nger er.YESU U NAZARETI, TOR U MBAJUDA. (Jôn 18: 19-20)

Akaaôron a Ter wase

Zum u ne kende wan u or sha tsô, na fa er M lu Un yô, man shi er M gbe eren ma kwagh sha tahav av iyol yam ga, kpa M er akaa er Ter A tesem yô. Ka hegen je i lu ôron tar ne ijir ye, ka hegen je a dugh tor u tar ne kera ye. Man Mo, zum u a tôôm shin tar ne a kendem sha yô Me urugh ior cii her a Mo. (Jôn 8:28; 12:31-32).

Se er nen msen

Aôndo Ter, lu sha ishima You man Wan Wou tôô ican i terankon sha u vihin tahav mbu satan kera sha orumace ye. Na ior Ou grasia er ver a va nder vea Kristu imiongo yô. Se zamber ken iti ii Yesu Kristu Tor wase. Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA PUE-KAR-UHAR

KU U YESU SHA TERANKON

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH JÔN

Yesu fe er akaa cii a kar yô, man sha u Un a kure kwagh u icighanrwamabera lu or la yô; a kaa er: “Imiura kôrom”. Hen ijiir la ityumnger lu her a vinegar poo; tsô ve tôô ikireyongo ve wa shin vinegar, ve shindi sha iyiagh ki hisop, ve za un a mi sha zwa. Yesu ngohol vinegar la yô, A kaa er: “Bee ve”. Tsô A suwa ityogh, A na jijingi na kera, A sule. (Jôn 19:28-30).

Akaaôron a Ter wase

Tere, shie kuma, Na Wan Wou icivir, sha er Wan Wou kpaa Una na U civir yô. M na U icivir shin tar ne, man M kure tom u U nem wer, M er la. Hegen yô Tere nam icivir hen awe, sha icivir i M lu a mi her a We je, er i lu a gba tar ga la. (Jôn 17:1:4-6).

Se er nem msen

Tere u mhôôn, sha u tesen dooshima Wou u vesen hen a vese yô, U na se Wan u mtswen. We a rumun yô, A nyôr a vese cii ken naagh nagh ku dedoo kula; sha er se civir We ken gbenda u voogh yô. Se zamber ken it ii Yesu Kristu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA PUE-KAR-UTAR

I HUNGWA A IKYOM I YESU SHA TERANKON

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH JÔN

Ken masejime u akaa la, Yosev u Arematia, un u a lu orhemen u Yesu, kpa lu ken myer, sha ci u cian mbajuda la, zamber a Pilatu er a na un ian un na tôô ikyom ii Yesu kera, Pilatu rumun. Tsô a za a tôô ikyom i Yesu kera. Shi Nikodemu u yan hii van hen Yesu tugh la kpa va, a va a mire u i nungwa sha alue yô, yohogh nagh kuma er pam ukyaren akunduataan nahan (Jôn 19:38-39).

Akaaôron a Ter wase

M ngu eren msen sha ci ve, ka sha ci u tar M eren msen ga. kpa ka sha ci u mba U nem la, gadia ka mba Ou je. Akaa a a lu a am cii ka a Ou, a Ou di kpa ka a am je, shi i nam icivir ken ve kpaa. Kera lun yam shin tar ne ga, kpa mban yô mba shin tar ne heregh. Mo yô M ngu van hen We, cighan Ter. Mba U nem la kulan ve ken iti You, sha er ve lu kwagh môm er se nahan. (Jôn 17:9-11).

Se er nen msen

Tere, er i kende a wan Wou, i made Un sha Terankon yô, ngô Na Maria tile her, lu yan ican imiôngo vea Na. Eklesia Wou kpaa ma a lu ken mzoo môm vea Yesu sha atsan man ku Na, er ve a zua a ci ken uma uhe u Un a va nder ami la yô. Se zamber ken iti ii Yesu Kristu Tor wase, Amen

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA PUE-KAR-UNYIIN

I GBIR YESU SHIN UWAR

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan ne man U yem tar ye.

KEN LOHO U DEDOO SHA WEGH KU ORJIGHJIGH JÔN

Tsô ve tôô ikyom ii Yesu la ve wa ken akondo ve kange kua akaahumandoon sha inja i m ii mbajuda. Yô, ape i mande un sha Terankon la sule lu her, man war lu her u i lu a ii or ker mayange ga yô. Ka ken u je man ve ii Yesu, sha ci u iyolkohol i Mbajuda gadia war la lu ikyua hen ijiir la. (Jôn 19:40-42)

Akaaôron a Ter wase

Man ka sha ci u mban tseegh M eren msem ga. ka sha ci u mba ve a nam jighjigh sha kwaghôron u mban la kpaa, sha u ve cii ve lu kwaghmom sha er We, Ter, u lu ken a mo, Mo kpaa M lu ken a We nahan. Sha u ve kpaa ve lu ken vese; sha er tar ua na jighjigh er U tindim yô. (Jôn 17:20-21).

Se er nen msen

Aôndo Ter, mgbe u U gba orumace la lu tom u kpilighiyol; mwar na hemba kpilighiyol, ma se gbe wegh u vendan hanma kwagh u a meen se sha u gban ken kwaghbo ga, man ma se er kwagh ne ken gbenda u dedoo sha er se va nyôr ken iember i tsôron la yô. Se zamber ken iti ii Yesu Tor wase, Amen.

Orhemen: Zungwe se mhôônom Tere,

Ior: Zungwe se mhôônom.

Icam

IJIR I SHA PUE-KAR-UTAAN

YESU MOGH SHIN KU

Orhemen: Se civir We, Kristu man se wuese We,

Ior: Sha ci u ka sha Terankon Wou u tseghan naman U yem tar ye.

KEN LOHO U DEDOO SHA WEGH KU ORJIGHJIGH MATYUU

Tsô, iyange i memen i been kera, man sev mbu sôôn u aven sha iyange i lahadi yô, Maria Magdalene man Maria u gen la ve va sha u nengen war. Yô zegemtenger u tar tenger, gadia Ortyom u Ter sen sha, va menger iwyen la kera, tema sha mi. mluashe na lu er ka inyiar nahan, akondo na kpaa kungu seghsegh er awombo nahan. A gema a kaa a kasev mbera er: “De cie nen ga, gadia m fa ka Yesu u i mande Un sha terankon la ne keren ye. Ngu heen ga, A nder er lu kaa nahan”. (Matyuu 28:1-6).

Akaaôron a Ter wase

Nenge se mba zan sha Jerusalem, man akaa a Uprofeti nger la cii aa er Wan u Or, gadia a na Un sha ikyev i atôatyev, a naha Un tar, a hee Un, man a haa Un azer iyol, a gbidye Un akpa cii man ve a mase wuan Un ye. Kpa sha iyange i sha utar la Un a nder shin ku. (Luka 8:31-33)

Se er nen msen

Aôndo Ter u hemban agee man u tsôron, Wan u mtswen kpe, sen shin mbakpenev man mase moughn shi yemen ken iengem Na ye. Wase er mbajighjigh mba i ii ve a Na imiongo ken Batisema cii, ve a zua a uma u tsôron sha mnder Na shin ku yô, Se zamber ken iti ii Kristu Tor wase, Amen.

MSEN SHA AWASHIMA U PAPA WASE

Ter wase U a lu sha…

Se sugh Maria…

Iengem i lu a Ter…

Se er nen Msen

Aôndo u hemban agee man u tsôron, ka sha mhembe u Wan Wou Yesu Kristu hemba ku man mogh shin ku U hide a vese ken uma u he ye. Za hemen a tom u iwanger ne ken avese, er se mba se lu eren tom u misiterium ne se de u eren We tom mayange ga yô. Se zamber ken iti ii Yesu Kristu Tor wase, Amen.

Iorhemen: ken iti i Ter, man Wan, man Cighan Jijingi

Ior: Amen.