IKYAV I TERANKON
Ken iti i Ter man Wan man Cighan Jijingi, Amen.
Ter, ka iyouv mbi lu kwaghyan wase u ikov ikov ye. Man shighen u uter asev ka vee zua a iyou mbi hev yô, kwagh la a doo ve mimi. Or môm nan bende mbi sha zwa ga, saa orvesen nana vande yan. Kpa Ter, ka We U lu Orvesen Wase u mimi ye. Nahan, se va her a We a iyou mbi tsutsaav mbin. Se mba wuese We sha nagh Ou her a vese, man se mba pinen We er U seer se a seer iyouv sha dooshima Wou yô. Na se, shighen u se lu yan kwaghyan wase ne nahan, mayange se kera zohon zwa ga, shin se de vihin iti i orgenegh kpaa ga. kpa hanma shighen u se tem sha u yan luam yô, na se, er se wuese We sha nagh ku kwaghyan ne, man na se bem kua doosishima a angbianev mba ve tem yan imôngo a vese la.
Na se ayol aa taver man asema aa kundun kpaa. Man umbur se sha mba vanya kua ancogholouv kpaa, er se yila ve sha u vea ya a vese imôngo yô, gadia We, U ngu Ter u mba ve lu a ter ga, shin kwase ga, shin ya kpaa ga, Amen.
Ior cii: Ter, se sugh U, se wuese we Na se kwaghyan wase u ayange ayange shin tar ne, man uma u tsoron sha tartor Wou.
Msen sha aci u Mbakpenev
Psalm 130. Ka shin aiv je m yer U ye, Tere. Ter ungwa imo yam, ver ato, ungwa imo i uzamber av. Tere, aluer Wea wa aferakaa iko yô, ka an ma nan til sha Tere? Kpa We U ngu a mde u asorabo, sha er a cia U yô. M ngu veren ashe keghen Ter, Uma wan ngu kehgen ka mkaanem Nam m veren ishima m kehgen ye. Uma wam ngu veren ashe keghen Ter, hemba mbakuran mba ve veren ashe ve keghen m-av u use yô. We, Israel, ver ishima kegh Ter, gadia ka hen Ter mhôônom ma lu ye, man hen a Na mpaa ngu wuee. Ka un je Una paa Israel sha aferakaa a na cii ye. Ter, na ve mmem u tsôron; wanger ve sha iwanger i tsôron, er ve mem ken bem. Amen.
Se er msen; Aôndo ka We U gbe umace cii ye, man ka We U paa se kpaa ye. De mbayev Ouv mba nomsoov man mba kasev, mba ve kpe kera la, asorabo a ve cii er vea zua a mhôônom Ou, ma ve lu veren asema sha mi gbem, sha msen wase ne yô. Ken Yesu Kristu Tor Wase, Amen.
Msen sha inyom i hegh (wer yange i hihi i Januray)
Ter Aôndo ka We U lu Orvesen u hanma shighen cii ye. Ka sha tahav Ou mbu hemban U er iwer man anyom man shi ikov i ikov la mkpaa ye, man ka awashima Wou er hanma or nana lu a uma u nan yô. Gadia U gba hanma kwagh cii, man U na ve tom ve u eren her a We, sha awashima a U na ve vough. Se fa er se lu vihin tom wase u eren her a We sha ashighen kposo kposo yô. Kpa shighen u se lu a uma shin tar ne yô, se mba a ian i veren asema her a We.
Mayange je, or u asorabo u nan lu geman ishima man hidden her a We a ijungwen i mimi yô, nana saa ashe ga. Ka We U kohol mbajungwen cii man U lu nan ve mde u asorabo a ve ye. Hegen iyom av. Nahan se taver asema, man se pine U gratia ne er se due ken mlu wase u tse man er se dondo igbinda You i mimi man i perapera yô. Nahan na se se cii, ken inyom i ngin, u zungwen asorabo ase a a kar kera la, u den angianev asorabo a ve eren her a vese, man u zan hemen sha gbenda u bem kua doosishima, Amen.
(Fada, shin or u hemen msen, una gema, una pine ior er)
Ne mba geman asema sha asorabo ase sha inyom i i kar la, man se mba veren asema sha Aôndo her inyom i he ne.
Ior cii, Se mba geman asema sha asorabo ase sha inyom i kar la, man se mba veren asema sha Aôndo her inyom i he ne.
Aôndo u hembanagee, uter asev mbayiase, ve lu yôôn isho ve man ve lu tan icia sha swem, u a lu dyako, ve la. Kpa se, se mba ungwan kwagh u Wan Wou Yesu Kristu, se fa er isho cii ka i duen her a We tsee yô. Nahan se kera tan icia sha kwagh môm môm u U gbe ga, gadia ka We, Aôndo u mimi, U lu icia yase kua perpera wase kpaa ye.
(Hegen hanma or nana hen sha asorabo a nan vande eren ken inyom i i kar la).
(Ior cii vea huan ving sha shighen kpuaa er vea umbur akaabo a ve yô.)
(A been kera yô, Fada, shin or u hemen msen una naa er:)
Tere, se mba geman asema sha asorabo ase. We kpaa, na se mde u a.
(Fada, shin or u hemen msen, una or atindi a Aôndo a pue la. Man hanma tinti yô, ior cii ve kaa er; “Ter, se vihi tindi Wou ne. De se, zungwe se mhôônom”. A Been kera yô, Fada, shin or u hemen msen, una kaa er:)
Tere, se er kwaghbo her a We, man her angbianev asev kpaa. Ka Wan Wou Yesu Kristu yange A tese se er aluer se de mbagenev asorabo a ve yô, mayange se fatyô u zuan a mde u asorabo ase yô. Man uter asev kpaa ve lu a tindi u dedoo sha u hymen iyongo, u i yer er ifan i hamber la. Gadia ve kpaa, ve fa er aluer angbian a lu a kwaghbo ken ishima a angbian na ugenegh yô, tar ua vihi keng. Tso er se lu ungwan kwagh U Aôndo hegen cii yô, se ver ato sha mkaanem ma Yesu mala, man shi se dondo gbenda u uter asev la kpaa. Nahan se cii, se de mbagenev akaabo a ve lu eren se la, man se zamber angbianev er vea de se asorabo a se lu eren ve yô.
(Ior cii, Se de mbagenev akaabo a ve lu eren se la. Angbianev, se de asorabo a se lu eren ayol ase cii.)
Ter Wase, U A lu sha…
Ken iti i Ter man Wan man Cighan Jijingi, Amen.
(Kpaa aluer ior ve ngee ga yo, doo er hanma or shin hanma kwase a mough sha a kaa er; “M de mbagenev akaabo a ve lu eren mo cii. M zamber a ven, angbianev av, dem nen asorabo a m eren ne cii”. Ior cii, Se de u a cica.)
Mbamsen sha shighen u lôôn akôr:
Ter, ka We U gbe tar ye. Man ka We U pav mgerem vea inya kera ye. We, mgerem ma lu a tom u ndohor inya er uma una fatyo u duen yô, man u kilen hanma kwagh u hôngorough kera. Inya, kpaa, i lu uma, er ia lu ngô u hanma kwagh cii yô, gadia hanma kwagh cii ka shin inya a dugh ye. Man U haa akaa aa doon, shin inya, er ikon kua toho man samuyia er inya ia kera gba luun gbilin tsô ga yô. Man U seer shagba sha u gban inyoon kua itoho atô kposo kposo, er shin inyam i kosun, man inyam i zenden inya anza kposo kposo. Man been kera cii yô, U mase kuren tom tsatsa sha u gban umace, nomso man kasev.
Ka nomso man kasev je, U gba ve ye, sha aci u luun mbawasen ayol a ve, man er vea mar ônouv sha u ivin tar yô. Gadia U ver umace sha u nengen sha hanma kwagh u U gbe cii. Akaa la cii U wa a sha ikev i or sha er nana lu a mkpeiyol gbem yô. Man We, Aôndo, U na Adam, or u hiihii la, tom u nengen sha sule Wou cii, gadia tar la cica lu sule Wou. Nahan tar hingir dyako wase man tom u sule lu ityôikyaa i hanma tom ugenegh u eren. Nahan tar ka inya tsee ga, ka ikon kua toho tsee ga, ka ya u umace kpaa, gadia We, Ter Aôndo, na se ian i tsan shin mi. Tar, ka umace man shi ishule, man toho kpaa, gadia U ver hanma kwagh sha ikev i ônouv Ou. Nahan kwaghbo nyor her a vese. Man angbainev ve hingir u paven a ayol ave man tar vihi kpishi. Uter asev, ve fa kwagh la, man ve ver asema sha tar u sôron, er iyuhwe ia de man asema aa kundu yô. Gadia mhen ve lu er, tar u sôron doo. Man tar doo ga, saa kwaghyan una ngee ken ishule man angbianev vea tema imôngo ken uya veve saan saan ye. Kpa tom u sôron tar la hemba ve sha aci u tar u vihi yum yô.
Kpa We, Ter Aôndo, U vanden nengen sha mzeiyol wase ne yô, U tindi Wan Wou Yesu Kristu er Wen Una va sôr tar sha Awambe Na aa haan. Ka Wen je a lu or u kahan sule Wou u mimi ye, gadia A va lôô ivor You i U tese Un la, man shighen u uma Na kom u been kera yô, A na se ônouv er, se hingir u luun angbianev sha mye u kwaghyan ne. Tso, Yesu sôr tar, sha ku Na, man A hembe tahav mbu kwaghbo kpaa. Nahan se taver ishima, gadia se fa hegen se mayange U kera hungur mtem wase shin tar ne ga. Hegen yô shi se hii tom wase u sule u kahan. Hanma inyom se mba hiin ityom i ityev sha adondon adondon, avom aa kahan, kua akor aa lôôn, ammine aa puun, man aa kuran kpaa. A been ishwa i wuhen yô, shighen u timen iyouv mbi hev ar ve. Tsô iwer ia Karen kpuaa nahan se gba huran ihande, man ityom i genev er tsinkafa i i sundan man i gbidyen nahan kua wua u caghan kpaa.
Kpa hegen yô, se ver mkohol u ityom yase sha ikev You. Ka her a We, Ter, man hanma shagba wase a dugh ye. Mayange se kera lu a a iyol i maren sha agee a yolou ase shin kwaghfan wase ga, gadia ka We U lu Orvesen u hanma tom u eren ye. Ka We je U ne uter asev tom u sule ne, man se, mbayev veve kpaa, se lu mba dondon gbenda ve ne ye.
Nahan Ter, nenge sha a vese sha tom wase ne. na se agee a yolouv sha hanma shighen man na se kwaghfan u eren hanma kwagh sha inja vough. Na se iyange man ura gadia ka sha ve iyiav ka mbi vese vough ye. Na se kwaghyan u dedoo, er se tema ken uya asev saan saan yô. Man na se er mayange se hungur erdoo Wou her a vese ga yô. Gadia hanma kwagh cii due her a We, ken Yesu, vea Cighan Jijingi, Amen.
Ior cii: Aôndo, na se kwaghyan u ayange ayange. Se mba ônouv Ouv, de kera hungur se ga.
Ter Wase U A lu sha…………………………………
Ken iti i Ter man Wan man Cighan Jijingi, Amen
